ओली ‘विदेशीको टाङमुनि छिरेको’ प्रचण्डको आरोप

Logo १० असार २०७८, बिहीबार २२:४८ | Aadil Times                  

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले राष्ट्रपति र प्रधानमन्त्री मिलेर नेपालको लोकतन्त्र नै कमजोर बनाउन लागेको भन्दै चर्को आलोचना गरेका छन् ।

विपक्षी गठबन्धनले गरेको सम्पादकहरुसँगको छलफलमा अध्यक्ष प्रचण्डले राष्ट्रपति संस्थाकै बदनाम भएको आरोप लगाए ।

उनले अहिलेको राष्ट्रपति संस्थाभन्दा राजा नै ठीक रहेको आभास भएको  टिप्पणी  समेत गरे । उनले भने,‘राष्ट्रपति कार्यालय सबैले अभिभावक भनेर, संविधानको संरक्षक भनेर, अझ म त महिलालाई अघि सारिदिउँ भनेर अघि सारेको, हेर्नुस त राष्ट्रपति संस्था कस्तो भयो ?अहिले त राष्ट्रपति संस्था कस्तो भयो भने…यो भन्दा त राजा ठिक थियो नि। अहिले त सान पनि छैन । नाम पनि छैन । इज्यत नि छैन । कस्तो भयो हामीले बनाएको संस्था ?’

अध्यक्ष प्रचण्डले प्रधानमन्त्री केपी शर्मा ओलीका गलत कदमविरुद्ध जस्तो परिस्थिति आए पनि सामना गर्न तयार रहने बताए ।

केपी शर्मा ओलीलाई तीन वर्षमा राम्रोसँग चिनेको भन्दै  उनले भने,‘यो तीन वर्षमा राम्रोसँग चिने । संघर्ष पनि हामीले नै शुरु गरेका हौं । संघर्ष किन गरियो ? सुविधा लिन त त्यही सजिलो थियो नि । ओलीकै कारण संविधान, लोकतन्त्र, राष्ट्र सबै वर्वाद हुने भयो भनेपछि विद्रोह गरेका हौं ।’

अध्यक्ष प्रचण्डले कांग्रेस दक्षिणपन्थी नभएको तर ओली बामपन्थी पनि नरहेको भन्दै भने,‘कांग्रेस संविधान र लोकतन्त्र बचाउन हिडेको छ । केपी ओली संविधान र लोकतन्त्र सिध्याउन हिड्नुभएको छ । कांग्रेसले ओलीजीलाई विदेशीको टाङमुनि छिरेको आरोप लगाएको छ । ओलीजी विदेशी दलालको टाङमुनि नै हुनुहुन्छ । त्यसैले कांग्रेस दक्षिणपन्थी होइन, ओलीजी वामपन्थी होइन ।’

फरक प्रसंगमा अध्यक्ष प्रचण्डले एमसीसीबारे समझदारी गराएर संसदबाटै अघि बढाउने बताए । उनले भने,‘एमसीसीबारे एउटा समझदारी बनाएर संसदबाटै केही गर्नुपर्ने छ भने पनि गराएर समझदारीमा अघि बढ्छौँ । हामीले भनेका छौं, राष्ट्रिय हितअनुकुल हुनेगरी नै अघि बढ्ने हो ।’

gorkhali-news

सम्बन्धित खबर


gorkhali-news