खोप बढाउँदै लकडाउन हटाउँदै इजरायल, तर गाजा र वेस्ट ब्यांकका बासिन्दा उपेक्षित

Logo १८ जेष्ठ २०७८, मंगलवार १५:४४ | Aadil Times                  


इजरायल: इजरायलले कोभिड नियन्त्रणका लागि जारी गरेको लकडाउन खुलाउने भएको छ । देशव्यापी रुपमा खोप अभियान गर्दै लकडाउन खुकुलो बनाएको हो ।

खोपको मात्रा बढाएसँगै इजरायलमा पछिल्लो समय संक्रमितको संख्या पनि घट्दो छ । मंगलबारदेखि नै रेष्टुरेण्ट र अन्य मनोरञ्जन स्थलहरुमा प्रवेश गर्दा आम नागरिकले कोभिड खोप लगाएको प्रमाणपत्र पेश गर्नु नपर्ने भएको छ ।

स्वास्थ्य मन्त्री यूली एडेलस्टेनका अनुसार स्वास्थ्य मन्त्रालयमा हाल आगामी दुई सातामा कार्यालयभित्र मास्क लगाउनुपर्ने नियम पनि हटाउनेबारे छलफल भइरहेको छ ।

यससँगै इजरायलको अर्थतन्त्र र आम नागरिकले केही राहत महसुश गर्न पाउनेछन् । यद्यपि विदेशीका लागि भने इजरायलले अझै प्रवेश लगाएको छ । मंगलबार मात्रै इजरायलमा जम्मा चारजना नयाँ कोरोना संक्रमित भेटिएका छन् । र इजरायलमा हाल ३५० जना सक्रिय संक्रमित छन् ।

२०२१ को सुरुमा कोरोना संक्रमण व्यापक रुपमा फैलिरहँदा यहाँ हरेक दिन १० हजार संक्रमित देखिएका थिए । साथै ८८००० सक्रिया संक्रमित थिए ।

इजरायल सरकारले दशौँ लाख मानिसलाई अमेरिकामा विकास गरिएको कोभिड विरुद्धको फाइजर खोप लगाएपछि महामारी नियन्त्रणमा आएको हो । इजरायलमा हाल ५० वर्षभन्दा माथिका ९० प्रतिशत मानिसले खोप लगाइसकेका छन् । वा उनीहरु संक्रमणबाट निको भइसकेका छन् ।

साथै स्कुलहरुमा भने १८ वर्ष मुनिका विद्यार्थीहरुका लागि मास्क अनिवार्य गरिएको छ । जबकि १८ वर्षमुनिका बालबालिकाहरुलाई ठूलो संख्यामा खोप लगाउन अझै बाँकी छ ।

तर इजरायलले वेस्ट ब्यांक वा गाजा क्षेत्रमा बसोबास गरिरहेका अधिकांश प्यालेस्टाइनीहरुलाई खोप नलगाएकोमा इजरायल अन्तर्राष्ट्रिय समुदायमा समेत आलोचित हुने गरेको छ । वेस्ट ब्यांक र गाजामा रहेका इजरायलीहरुलाई भने लगाइएको थियो ।

ती क्षेत्रमा बसोबास गर्ने प्यालेस्टाइनीहरुका लागि प्यालेस्टाइन सरकारले नै खोप लगाउनुपर्ने इजरायल सरकारको जिकिर छ । कोरोनाबाट अति प्रभावित क्षेत्रमध्ये गाजा क्षेत्र पनि एक हो । जहाँ सोमबार २४६ नयाँ संक्रमित भेटिएका थिए । वेस्ट ब्यांकमा भने ५६ जना ।


सम्बन्धित खबर