मोरङ व्यापार संघले सीमा नाका जोगबनीमा आएका भारत सरकारको राजस्व विभागका केन्द्रीय अप्रत्यक्ष कर तथा भन्सार बोर्डका सदस्य सञ्जयकुमार अग्रवाल सहितको टोलीसँग भेटघाट गरि सीमा वारपार व्यापारका समस्याबारे छलफल भएको छ ।
अग्रवालसहित पटना भन्सार क्षेत्रका मुख्य आयुक्त (चिफ कमिश्नर) अजय सक्सेना र पटना भन्सारका प्रधान आयुक्त (प्रिन्सीपल कमिश्नर) श्री पीके कटियारको टोलीलाई एकीकृत जाँच चौकी (आई.सी.पी.), जोगबनीमा स्वागत गरी भेटघाट गरेको संघले जनाएको छ ।
संघका निर्वतमान अध्यक्ष प्रकाश मून्दडा, वरिष्ठ उपाध्यक्ष अनुपम राठी, वाणिज्य उपाध्यक्ष अनिल कुमार साह, कार्यकारी सदस्यद्वय अमित सारडा र श्याम राठीसहितको टोली छलफलमा सहभागी थियो ।
संघका वरिष्ठ उपाध्यक्ष अनुपम राठीले नेपालकै प्रथम उद्योग वाणिज्य संघको तर्फबाट स्वागत गर्न पाएकोमा हर्षित महसुस गरिरहेको बताउँदै मोरङ–सुनसरी आर्थिक कोरिडोरका लागि हाल खाँचो देखिएका केही आवश्यक व्यवस्थाबारे अवगत गराए ।
रेलमार्गबाट आई.सी.पी., जोगबनीसम्म बल्क कार्गो र कन्टेनरहरुको आवतजावतको व्यवस्था गरिनुपर्ने, नेपालका कृषि उत्पादन निर्यात गर्न आई.सी.पी, जोगबनीमा पीएफए टेस्ट ल्याब (परीक्षण प्रयोगशाला) र खाद्य क्वारेन्टाईन कार्यालय स्थापना गरी पोर्ट हेल्थ अफिसर नियुक्त गरिनुपर्ने, हाल जुट निर्यातमा प्रत्येक ट्रक पिच्छे अनिवार्य गरिएको ओजो सर्टिफिकेशनलाई सहज गरिनुपर्ने लगायतका सुझाव राठीले पेश गरे ।
कार्यक्रममा आई.सी.पी., जोगबनीका व्यवस्थापक रत्नाकर यादवले आ.सी.पी. , जोगबनीका गतिविधिहरुबारे अवगत गराएका थिए भने केही अन्य व्यवसायिक प्रतिष्ठानहरुले आ–आफ्ना सुझावहरु पेश गरेका थिए ।
