नेपाल र युएईबीचको एक दिवसीय क्रिकेट श्रृंखला आज सोमबारबाट काठमाडौंमा सुरु भएको छ ।
कीर्तिपुरस्थित टियु क्रिकेट मैदानमा नेपालले टस जितेर फिल्डिङ रोजेपछि युएईले पहिले व्याटिङ गरिरहेको छ । दुबै टोली सोमबारको पहिलो खेल जित्दै श्रृंखलामा सुखद सुरुवात गर्न चाहन्छन् ।
नेपाल र युएईबीच तीन खेलको एक दिवसीय श्रृंखला हुन लागेको हो । दोस्रो एकदिवसीय खेल बुधबार तथा तेस्रो खेल शनिबार हुने भएको छ । नामिबिया विरुद्ध विश्व क्रिकेट लिग दुईको तयारीमा रहेको नेपालले युएईसँगको श्रृंखलालाई अभ्यासको रुपमा लिएको छ ।
